Frumlegt og skemmtilegt.

Ég var að fá bréf inn um póstlúguna hjá mér.   Það var ekki gluggabréf, ekki vélritað utan á umslagið, heldur handskrifað og afskaplega forvitnilegt.  Ég taldi þetta helst vera boðskort en innihaldið var heldur betur óvænt lesning.  Ég varð hrifin og sé ekkert nema jákvætt við það - veit reyndar ekkert nánar um málið annað en það sem kemur fram í bréfinu.  Það er Leikfélag Patreksfjarðar sem stendur fyrir þessu. 

Leikfélagið var mjög virkt hér fyrir einhverjum árum síðan, setti upp sýningar að ég held bara árlega.  Verkin og sýningarnar hinar metnaðarfyllstu og oftar en ekki þekktir leikstjórar fengnir til að stýra.  Ég fagna því að félagið  skuli hafa verið hresst við og hlakka til að komast á leiksýningu.

Bréfið hljóðar svo:

 

Kæru bæjarbúar !

Leikfélag Patreksfjarðar hefur ákveðið að standa fyrir leynivinasambandi milli íbúa Patreksfjarðar.

Svona virkar það:

Hvert heimili fær eitt leynivinaheimili.  Heimilisfang og nöfn heimilismeðlima eru rituð neðst á þetta blað.  Fram að 20. desember á að reyna að gera eins vel og maður getur við sitt leynivinaheimili, t.d senda falleg skilaboð, eitthvert smáræði í pakka og auðvitað að reyna að finna upp á einhverju sem kemur skemmtilega á órvart.  Æskilegt er að gleðja sitt leynivinaheimili a.m.k einu sinni í viku.

Fyrir öllu er að koma í veg fyrir að það uppgötvist hverjir eru að senda hverjum.  Með þessu eflum við samkenndina enn frekar og finnum hve miklu máli það skiptir að fá hlýjar kveðjur og að einhver hugsi til manns. 

Laugardaginn 20. desember 2008 kl. 15:00 fer uppljóstrun leynivina fram í FHP og þar verða skemmtiatriði í anda jólanna sem Leikfélagið mun sjá um.

Vonandi taka allir vel í þetta og reyna að gera vel við sitt leynivinaheimili.

Stjórn LP - Leynivinanefnd LP.

 

Mér var sem sagt úthlutað heimili hér í bæ til að gleðja.  Nú er spurning um hvernig framkvæmdin á að vera og spennandi að glíma við það verkefni, ég tala nú ekki um þannig að heimilisfólkið verði ekki vart við leynivininn.  Til að vel takist til með svona þurfa auðvitað sem allra flestir að vera með því þetta kostar jú fyrirhöfn en hún er örugglega þess virði.

 

 

 

 

Athugasemdir

[Ruth (IP-tala skráð) 3.12.2008 kl. 21:09]

Frábært , frábært. Þetta er til fyrirmyndar. Vonandi að sem flestir verði með, helst allir. Ef þetta fer ekki í fréttirnar á sjónvarpsstöðvunum þá er mér að mæta. Áfram Patró.

[Þórunn (IP-tala skráð) 3.12.2008 kl. 23:26]

Skemmtilegt:=)

[Marta Gunnarsdóttir, 5.12.2008 kl. 23:22]

Já, þetta er góð hugmynd en oftast hefur hún verið notuð á vinnustöðum og skapað góðan móral og samkennd. Fyrir nú utan spennuna og forvitnina. Þetta er bara gott mál. Gangi þér vel.

[Anna (IP-tala skráð) 6.12.2008 kl. 12:49]

Takk allar.  Það eru auðvitað skiptar skoðanir en flestir jákvæðir og byrjað að fréttast af skemmtilegum sendingum - bara gaman að þessu.