10. október 2008

Sérkennilegt andrúmsloftið þessa dagana svo ekki sé meira sagt.  Mikil óvissa, spenna, hræðsla og hjá sumum ríkir örvænting.  Það er lítið annað í fréttum en ástand efnahagsmála á landinu og í heiminum sem von er en þó má koma auga á eina og eina frétt sem getur talist jákvæð.  Sumir eru hálfdofnir og vita ekki hvernig þeir eiga  að vera þessu hamfaraástandi.  Það er ljóst að margir upplifa hremmingar sem þá óraði ekki fyrir að eiga eftir að lenda í þ.m atvinnumissi sem án efa er erfið lífsreynsla.  Við þær aðstæður reynir auðvitað verulega á andlegan styrk.  Ástandið skellur þó misharkalega á fólki í daglegu lífi og allt hefur sína keðjuverkun. Mikilvægt að fólk átti sig á að hver manneskja  getur með hegðan sinni gagnvart náunganum haft góð áhrif sem styrkja  þessa keðjuverkun á jávkæðan hátt.

Í dag er Alþjóða geðheilbrigðisdagurinn sem haldinn er 10. október ár hvert.  Í dag er yfirskrift dagsins á Íslandi "Hlúðu að því sem þér þykir vænt um" og er athyglinni einkum beint að ungu fólki. Gott mál.

Einhvers staðar stendur "Lífið er fullt af unaðslegri tónlist, maður þarf bara að hafa hægt um sig til að hlusta".

Það er allt stútfullt af svona fínni speki um lífið og tilveruna, margt af því er gott og umhugsunarvert.  Sumum líður reyndar bara svo illa að þeim finnst svona speki ekki koma að miklu gagni.   Það er  bara þannig að ákveðnum hlutum í lífinu  fáum við ekki breytt, verðum því að taka því sem að höndum ber af æðruleysi  og vinna okkur í gegnum málin skref fyrir skref.  Vonandi tekst sem flestum að vera bjartsýn og missa ekki móðinn, það er svo mikilvægt enda langt frá því að allt sé svart í henni veröld. 

Komum auga á hversdagslegu, oft að okkur finnst sjálfsögðu  hlutina sem kosta ekkert en gleðja svo óumræðilega mikið. 

Njótið helgarinnar gott fólk og til hamingju, afmælisbörn dagsins   

 

Athugasemdir

[Sólveig Ara (IP-tala skráð) 10.10.2008 kl. 08:37]

Sæl Anna mín,

Takk fyrir góðan pistil.  Mestu máli skiptir að halda í vonina og kærleikann og að hlú að sér og sínum (þá á ég við alla í kringum okkur, ættingja, vini, kunningja, vinnufélaga). Vonandi sannast hið fornkveðna að öll él birti upp um síðir.

Bestu kveðjur,

Sólveig.

[Sóldís Fjóla Karlsdóttir, 10.10.2008 kl. 17:24]

Já, ástandið er svart í bili en vonandi léttir þessu hroðalega ástandi....og vonandi getum við tekið gleði okkar á ný.

Einhvers staðar stendur "Lífið er fullt af unaðslegri tónlist, maður þarf bara að hafa hægt um sig til að hlusta".  Þetta er örugglega rétt. Takk fyrir góðan pistil.