Án titils.

Nú þegar beinni útsendingu er lokið frá Kína á  mestu íþróttaleikum okkar tíma og við höfum fagnað frækilegum afrekum íþróttafólksins okkar eru haustvindar farnir að blása og það all hressilega.  Við erum hvött til að huga að lauslegu utanhúss. Fólk er farið að sækja skóla og  litlar manneskjur  sjást á ferðinni með stórar töskur á bakinu og vindinn í fangið.  Já hjá okkur þar sem árstíðaskil eru frekar skörp kveðjum við vonandi flest okkar ánægjulegt sumar.  Haustið mætt og veturinn framundan, já  lífið hefur sinn gang og við tökumst vonandi sem flest endurnærð á við bæði þau tilheyrandi og nýju verkefni sem framundan eru.  

Nýafstaðnir Ólympiuleikar voru stórkostleg hátíð.  Setningarathöfnin og sömuleiðis lokin voru glæsilegt sjónarspil.  Ég sá meira af setningunni  en lokunum og virkilega hreyfst af öllu því sem fyrir augu bar enda ekki annað hægt, þvílík flottheit.   Þessir leikar voru haldnir af þjóð sem geymir mikla og áhugaverða  sögu -  en  líka allt annað og meira en bara glæsileika.  Mér varð hugsað til bókarinnar Múrinn í Kína eftir Huldar Breiðfjörð.  Ég hef áður minnst á þessa bók hér í blogginu.  Myndræn og virkilega góð ferðasaga sem snart mig mjög.  - Hvet ykkur til að lesa og með því skyggnast inní líf fólksins í  héruðum  Kína.

Vona svo  bara að þið eigið sem ánægjulegast  haust 

 

 

Athugasemdir

[María Úlfarsdóttir (IP-tala skráð) 29.8.2008 kl. 16:24]

Alveg finnst mér haustið skella á bara einn góðan veðurdag! Bæði gott og vont... Takk fyrir bloggið og við verðum að fara að hittast .Kveðja, Maja

[Anna, 29.8.2008 kl. 22:24]

Já mér fannst þetta bara gerast 1,2 og 10 - sumarið búið.  En ég held í vonina um stillta og fallega septemberdaga eins og koma nú stundum.  En endilega verðum í sambandi fljótlega