Trúi því ekki fyrr en ég tek á því.

Já ég trúi því ekki fyrr en ég tek á því að samgönguráðherra muni fresta gerð ganga milli Arnarfjarðar og Dýrafjarðar.  Haft er eftir honum að þrýst sé á hann með frestun, nokkuð sem enginn gengst við að hafa gert.  Það er ekki síður hagsmunamál aðila  norðan Arnarfjarðar að fá þessi  göng, ég held að það  hljóti að vera góð viðbót að fá íbúa héðan sem neytendur þeirrar þjónustu sem þar er boðið uppá.  Eins og oft hefur verið bent á eru nú þegar orðin mikil samskipti á milli norður og suðursvæðis Vestfj. og fólk í stórhættu við að freista þess að fara á milli þegar tæpt er með færð. 

Mér finnst ekkert svo langt síðan að umræðan um göng milli Álftafjarðar og Skutulsfjarðar varð svona opinber(Súðavíkurgöng) eins og hún er um þessar mundir. Hugsanlega hræðist fólk  að aldrei verði af þeim þegar þau verða  ein eftir á listanum góða og muni því bara "gleymast"  þegar árin líða.  Ég hef skilning á sjónarmiði þeirra sem vilja göng til Súðavíkur það er ekki málið en þetta er spurning um forgangsröðun, því miður þá er það svo. 

Einhverstaðar las ég í pistlum undanfarinna daga um þessi mál að hugsanlega væri verið að þyrla upp einhverju moldviðri hér til að samgönguráðherra gæti slegið þessu á frest og borið því við  að aðilar væru ekki sammála um forgangsröðun.  Það væir sem sagt liður í frestunarferlinu að koma því í loftið.  Maður vill nú ekki trúa því að óreyndu að svo sé. 

Fyrir okkur snýst málið um að koma á boðlegum  samgöngum hér innan Vestfjarðakjálkans og það á ekki að þurfa  árið 2008 að benda neitt sérstaklega á hversu göng Arnarfjörður/Dýrafjörður eru mikilvæg í því tilliti. Löngu tímabært, en liðin tíð er liðin og nú er nútíðin, því horfum við fram á við og viljum ósköp einfaldlega mannsæmandi samgöngur, ekkert flóknara en það. 

 

Að öðru.........í dag er það svo  hörkuspenna  - leikurinn Ísland/Spánn.

ÁFRAM ÍSLAND

Athugasemdir

[Sólveig Arad (IP-tala skráð) 22.8.2008 kl. 09:22]

Heil og sæl Anna mín,

Það er þetta með samgönguráðherrann - þann er í mínum huga handónýtur sem slíkur og beitir endalaust "Ekki benda á mig" lausninni á öllum þeim málum sem snúa að honum.  Því miður er alltof langt í næstu kosningar, og ég segi því miður því það þar svo sannanlega að stokka upp í þessu gengi sem situr við völd.  Pistilinn þinn um daginn sem laut að ástandi vegarins í suðurhluta Patreksfjarðar er stórkostlegur - hvet þig og þann sem ritaði söguna að koma þessum greinarkorni í landsmálablöðin, því hvert örstutt spor sem stigið er í þessu er gæfuspor í rétta átt til að vekja ráðamenn til umhugsunar um ástand veganna.  Því miður eiga bæði Suðurkjördæmi og Vestfirðir (sem tilheyra Norðvesturkjördæmi) handónýta þingmenn - alla upp til hópa.

Bestu baráttukveðjur,

Sólveig.

[Anna, 22.8.2008 kl. 19:58]

Takk fyrir þetta Sólveig, við vonum það besta  - Maður hefur tilhneigingu til að ætlast til þess af kjörnum fulltrúum okkar að þeir vinni af heilindum hvort sem er í lands-eða bæjarmálapólitík.  Við eigum þessar vegabætur inni, það er á hreinu.  En með greinina þá fékk hún einhverja umfjöllun á sínum tíma og takk fyrir complementið um hana