Eitt kerti að blása á.

 

Já eitt kerti að blása á - allavega svona  í huganum, kannski eins og ein ósk fylgi með, það sakar örugglega ekkert   

Mér sýnist fólk gera bloggafmælum skil og ég ætla að gera slíkt hið sama - það er eins árs afmæli  hjá  þessari síðu í dag   Tók samt c.a 3ja mánaða frí á þessu tímabili.  Elfdist svo öll í blogginu eftir áramótin, eignaðist bloggvini,  fór að setja inn myndir og þ.h.  Lengi framan af sagði ég ekki nokkrum manni frá þessu fikti, var hálf feimin við það en svo hrundu múrar,  enda er þetta svo sem fyrir allra augum hér á netinu.  Í dag er ég órög við þetta, hef gaman af skrifunum og eyði hæfilegum tíma í þau.  Ég hef verið að lesa skilgreiningu bloggs hjá nokkrum.  Misdjúpar pælingar eins og gengur. Fólk bloggar um allt á milli himins og jarðar.  Dagbókarform, pólitík, kennsla og bara hvað eina.  Maður áttar sig fljótlega á því að það er samfélag innan bloggheimsins og hjá sumum finnst mér það virka eins og vinahópur og samskipti mikil sem getur auðvitað bara verið skemmtilegt.

Spurningu hefur verið velt upp hvort það sé stéttaskipting innan þessa heims sbr. nýlegan pistil bloggvinkonu minnar Hildar Helgu sem er fín lesning og gaman að sjá hvaða skoðanir fólk hefur á þessu samkvæmt kommentunum þar.  Sitt sýnist hverjum svo mikið er víst.

Ég rakst á blogg úr öðru bloggkerfi þar sem nokkur íslensk bloggkerfi  eru gagnýnd og borin saman af nokkurri þekkingu virðist vera. Viðkomandi skoðar hvern lið fyrir sig í kerfunum og gefur þeim svo heildareinkunn X af 10 mögulegum.  Hæstu einkunn gefur hann  ákveðnu kerfi 8,5 en Moggablogginu 8,0 önnur eru svo talsvert neðar.  Ég hef reynslu af öðru kerfi í gegnum félagsskap sem ég tilheyri. Ég verð að segja að ég er mjög ánægð með þetta kerfi sem ég valdi, þ.e kerfið  hjá Mogganum. 

Blogg er eins og hvert annað áhugamál,  ég  held því  áfram  á Moggablogginu og blogga  um allt og ekkert  a.m.k sjálfri mér til ánægju .

Hafið það sem best 

Athugasemdir

[Sólveig Ara (IP-tala skráð) 14.6.2008 kl. 13:17]

 Heil og sæl Anna,

Til hamingju með eins árs afmælið.  Bloggheimurinn er skemmtilegur, rétt eins og hvað annað sem vekur áhuga fólks. Mér finnst allavega gaman í þessum heimi.  Haltu áfram með þína góðu pistla - ég kíki á þig reglulega.

Njóttu lífsins og hafðu það sem allra best,

Kærar kveðjur frá Sólveigu.

[Anna (IP-tala skráð) 15.6.2008 kl. 12:23]

Takk Sólveig, ég kíki líka á þína. Njótið sumarsins og good luck með Jeppann