Óvelkominn gestur.

Gesturinn valdi laugardaginn til innrásar, þennan bjarta fallega apríldag.  Ég reyndi framan af degi að losna við hann með öllum ráðum, hann hefur ekki sýnt mér mikinn áhuga í gegnum tíðina. Seinnipartinn ákvað ég að fara út til að reyna að losna pent við hann á leiðinni, taldi sterkar líkur á að það tækist.  Ég fór í heimsókn.  Þar voru fyrir bandamenn gestsins sem ég gat engan veginn slegist við, ég vissi ekki fyrirfram af þessum öflugu bandamönnum í þessu húsi.  Fór því heim aftur eftir tapaðan slag.  Gesturinn hékk yfir mér, hagaði sér leiðinlega, potaði í mig og hristi  svo ég varð ringluð. Um nóttina þegar ég lá með sæng og teppi toguðumst við á en oftar hafði gesturinn betur.  Píndi mig á alla kanta, bæði vatt mér inn í sængina þannig að mér varð ómótt af hita, eða reif hana af mér svo að kuldinn varð óbærilegur í kófinu.  Núna þegar ég skrifa þetta finnst mér hann sýna á sér fararsnið og ég krossa fingur.  Enda hef ég í dag lverið löglega afsökuð í hlutverki sófadýrsins og það hefur þessum gesti auðvitað bara leiðst.  Ég vona að hann láti ekki sjá sig hér aftur  í bráð 7,9,13.  

Farið vel með ykkur gott fólk og látið ykkur ekki kólna því það er allt eins víst að gesturinn "flensupúkinn" stingi sér niður og hrekki ykkur aðeins.

 Takk fyrir góð komment á síðuna  í dag .

Athugasemdir

[Sólveig Ara (IP-tala skráð) 14.4.2008 kl. 11:23]

Halló Anna aprílstelpa

Gaman að lesa hugrenningar þínar.  Láttu þér batna og farðu vel með þig.

Kærar kveðjur vestur frá Sólveigu Ara úr Ásgarði. (líka aprílstelpa )